Titus 1
1Wasika ye kwo gmi n Bulus akun nu, Shekwoyi fyenu, Yesu Kristi tnu-tnuyi. 2A tnu mi ma ɓe n gaiciya gai n aza ba nu n Shekwoyi la ɓa kni nyi, ma wu ɓa Shekwoyi gaiciya gaiciya n kwo shan aza wyewyeyi do nyi. N na bai ɓa bwa wyewyeyi nyalo-nyalo nya n Shekwoyi ɓei zhin ɓa alkawali tunyi kafin a sa anyi, woi ta ce a katan. 3Dna n owo esa manayi, wa wu yi Nabari manayi, wa gami izini ma gna aza vinya. Dna n Shekwoyi eyi gniyi egbega, wo la ye ma zhin wo tnu-tnu ye ga wo.4Kwoi lo Titus aba n wo zhin emi oɓi dna n Dagayi zokwo nyi. Shekwoyi Dada n Kristi Yesu eyi gniyi, wo gaho anabarka n bugba fuyi.
A tukwoda Kni
5Ma fa ho tu n muse Karita n na abai ha zhin ɓo n ho ɓa mi ha bma a ikklisiya zhin nu n ɓa nyi nɓo. Mi ye ha kni a pasto n ezhin doho-dohoyi ha vi ngye shi mi ɓei wu ho nyi. 6Aza n ha kni a kpe ɓa ye ntu n ɓa asese manayi ɓo, nyikwoza gmanyi da oɓa ɓi ɓai ye Dagayi, to ge a tukwo gnana-kwoyin, nɓata vi oɓa azakwoyi ɓedan.7Tilas pasto wa ze oza nu n nata ciwo aɓenya n wo asesen, gama ɓa zhin Shekwoyi atnu-tnu zhinyi nu, ɓato zhin aɓekwo zhin yi, kwo a tna mi wanshi yi, to ɓa ze ajesin yin, agusun yin, kwo agyiwye shakpe; woyin. 8Ɓa ze azhiɓeyi goyi n ɓa puwa, ɓa ye enya n kwo bmiya ɓa ze aza awyega da, ɓai zhin ɓo n kunce, ɓai zhin aɓo manayi nubo to ge a tukwo-gnana kwoyin. 9Tile oɓa gaiciya ga kwa migni n kala yi, n na bai n ɓa ɓa mi ɓa wu azaje, ɓa wu aza n ɓa ta gwo oɓa ɓedan. Ɓa wu ɓa aba n ɓa bwi aba.
10Gama aza lo n mwa begye n ɓa ta vi ɓon, Deye kwo zhin gaiciya nu tun ba ga na aza aba n ɓa gna nge tilas a shi a Yahudiyi awyidna bwa nyin. Ama deye zhin ɓeda gbeloyi nu, kwo bua za wye, to ɓa gye gaiciyan. 11Tile a hana n kwoi, ala aza pmi awye ya n Shekwoyi alheri, amalami ye pya bwa agyiwye nu ye. 12Zaho n ɓa mi, anabi n wo gmi n Karita wa ci ge, “A Karitayi zhin akataceyi nu, ɓa wu ngye anyafanya abwatoyi nu, n ɓa asese bwasun ɓa fu ɓahin nubo nu.” 13Deye zhin gaciyanu, ntucenu daɓo n na Yesu-viyi n kala yi, shi kwo kunce kwa mi ɓa gaiciya gagni. 14Ɓa fa tnubua kna ɓo n na a Yahudiyi esi n na aza ɓeyei n ɓa la avun pmin wu gaiciya nyi.
15Oza n wo bugba gyi-gyi-yi wo gye anya vinya n gyi-gyi yi, ama oza n wo bugba tucegye n tna gaiciya, wo gye nyaho-nyahoi n tna bmiya yi nu, gama owo bugba cegye nya n bugba kala kpei nu zhin woi wo lonu, woi gye lo nu njesun. 16Azayi pya ci ge ɓa kpe Shekwoyi ye, ama nha gye nya n ɓa zhin, ha ku kpe ge ɓata kpe wo ye lon. Ɓa wun-wun yi ya, to ɓai vi ɓom, n tna a pma dna n ɓe manayi zhin.
Copyright information for
GbrGAW